Poslovne vesti - Makedonija

Енергетската ефикасност во Македонија се уште на ниско ниво

Македонските инвеститори имаат интерес да вложуваат во обновливи извори на енергија, посебно откако државата почна да обезбедува субвенции за оваа намена, но искористеноста е се уште релативно мала, само два до три отсто од вкупниот потенцијал на сончевата, геотермалната и енергијата од ветер.

Причината за ова експертите ја лоцираат во недоволната информираност на јавноста и финансиите.

- Ретко кој од нашите луѓе знае колку и што значи да се инвестира во сончеви колектори, дали е тоа исплатливо, колкава е заштедата или за колку време вложените средства се враќаат. Од друга страна, државата веќе дава субвенции за производство на електрична енергија од обновливи извори, а постојат и други можности - изјави професорот Марко Серафимов од Машински факултет на презентацијата на австриски компании специјализирани за производство на енергија од обновливи извори и за еколошка технологија во Стопанската комора на Македонија.

Околу 40 отсто од вкупната енергетска потрошувачка во земјите од Европа и светот отпаѓа на потрошувачка на енергија во објектите. Тука, смета Серафимов, има голем простор за заштеда, не само преку намалување на потрошувачката, туку и преку поголема примена на обновливите извори енергија.

- Во Европа кон која се приближуваме, моментно е на сила Директивата за енергетски карактеристики на објектите од 2002 година. Но, годинава е изработена нова што ќе почне да се применува во 2011 и предвидува т.н. принцип на три пати по 20 или, 20 отсто помала потрошувачка на енергија, 20 проценти помала емисија на стакленички гасови и 20 отсто поголема примена на обвновливи извори енергија за станбени и јавни објекти. Кај нас таква обврска нема, но во тек е проект за воведување на Директивата за енергетски карактеристики - рече професорот.